2012, ഡിസംബർ 14, വെള്ളിയാഴ്‌ച

നോസ്റ്റര്‍ഡാമസിന്റെ പ്രവചനവും ഒരു ഗന്നം style ലോകാവസാനവും

                                                   - Abid Ali Padanna  
ചിലയാളുകള്‍ക്ക്‌ ലോകാവസാനം ഇടയ്ക്കിടയ്ക്ക് ആഘോഷിക്കണം, ചുരുങ്ങിയത്‌ എല്ലാ വര്‍ഷവും, അല്ലെങ്കില്‍ വര്‍ഷാവസാനമെങ്കിലും. പഴയ പല പ്രവചനങ്ങളും കൊഴിഞ്ഞു വീണത്‌ അവര്‍ക്ക് പ്രശ്നമല്ല.പുതിയത് കേള്‍ക്കാനും വിശ്വസിക്കാനും പ്രചരിപ്പിക്കാനും പ്രത്യേകിച്ച് ആളെ കിട്ടുമ്പോള്‍ .ആധുനികനും സംസ്ക്കാരത്തിന്റെ ഉത്തുംഗതയില്‍ എന്ന് പറഞ്ഞു ഞെളിഞ്ഞു നില്‍ക്കുന്ന  iPad ഉം iPod ഉം കൊണ്ട് നടക്കുന്ന വിദ്യാസമ്പന്നര്‍ തന്നെ ഇതൊക്കെ തലയില്‍ ഏറ്റി നടന്നാലോ ?

ലോകാവസാനം യൂടൂബിലൂടെ  
ലോകം അവസാനിക്കുകയാണ്. ഇതാ ഇതാ ഇനി ദിവസങ്ങള്‍ മാത്രം. നിങ്ങള്‍ ആരും അറിയില്ലേ ?എന്നാല്‍ ഇതാ അറിഞ്ഞു കൊള്ളൂ.....
Nostardamas

500 വര്ഷം മുമ്പ് നോസ്റ്റര്‍ഡാമസ്   എന്ന ഫ്രഞ്ച്കാരന്‍ പലതും പ്രവചിച്ച കൂട്ടത്തില്‍ ഇങ്ങനെയും പറഞ്ഞുവത്രേ !!!
"From the calm morning, the end will come. When of the dancing horse the number of circles will be nine."
അര്‍ഥം നമുക്ക് ഇങ്ങനെ വായിക്കാം
"ശാന്തമായ സുപ്രഭാതത്തില്‍ , അവസാനം സംഭവിക്കും .അന്ന് നൃത്തം ചവിട്ടുന്ന  കുതിരയുടെ സംഖ്യ ഒമ്പത് വളയത്തില്‍ എത്തും."



ഇതില്‍ പറഞ്ഞ ശാന്ത സുപ്രഭാതത്തിന്റെ നാട് (Land  of  calm morning) എന്ന് പറയുന്നത് കൊറിയയാണ്.
PSY  in GANGNAM Style 
നൃത്തം ചവിട്ടുന്നത്  ആരാണെന്ന് അറിയില്ലേ അത് നമ്മുടെ സാക്ഷാല്‍ കൊറിയന്‍ ഗായകന്‍ പ്സി (Psy) തന്നെ.
ലോകം ഇളക്കി മറിച്ച അതേ പ്സി. ഗന്നം Style-ന്റെ  ഉപജ്ഞാതാവ്. കുതിര നൃത്തത്തിന്റെ ലോകാചാര്യന്‍ .
ഒമ്പത് വളയം എന്നാല്‍ എന്തെന്ന് നമ്മുടെ സോഷ്യല്‍ നെറ്റ് ഉപയോക്താവിനോട് ചോദിച്ചു അറിയേണ്ട കാര്യമില്ലല്ലോ,
അത് നമ്മുടെ YouTube ഹിറ്റ്  തന്നെ .മനസ്സിലായില്ലേ ?ഒന്ന് കൂടി പറയാം.....

ഗന്നം Style-ന്റെ വീഡിയോ  ആല്‍ബം യൂടുബില്‍ ഒമ്പത് പൂജ്യം ഹിറ്റ് അഥവാ ഒരു ബില്യന്‍ ഹിറ്റ് കിട്ടിയാല്‍ അന്ന് ലോകം അവസാനിക്കും.
ഹിറ്റ് മാത്രമല്ല ഇപ്പോള്‍ പ്രശ്നം. മായന്‍ കലണ്ടര്‍ പ്രകാരം ലോകാവസാനം ഈ മാസം 21 നന്നു  ആണ് നടക്കേണ്ടത്‌ .ഇനി ദിവസങ്ങള്‍ മാത്രമേ ഉള്ളൂ
കൃത്യമായി പറഞ്ഞാല്‍ 21/12/12.....ഈ ദിവസം തന്നെ  യൂറ്റുബിലെ ക്ലിക്കും ഒമ്പത് പൂജ്യം കടക്കും എന്ന് അന്ന് തന്നെ ലോകം അവസാനിക്കും എന്ന് ഇവര്‍ പ്രചരിപ്പിക്കുന്നു. 
ആധുനിക സോഷ്യല്‍ നെറ്റ് വര്‍ക്കിലെ അന്ധവിശ്വാസികള്‍ ഇപ്പോള്‍ YouTube  ഹിറ്റും നോക്കി ഇരിപ്പാണ്. ഇതിനെയാണ്  നാം  ആധുനിക നെറ്റ് അന്ധവിശ്വാസം എന്ന് പറയുന്നത് . എല്ലാം കൂടി ആയപ്പോള്‍ ആകെ ഗുലുമാല്‍ 21 -ആം തിയതിയോടെ ലോകം തവിട് പൊടി.കൃത്യമായ സമയമൊക്കെ അറിയിച്ചു കൊണ്ട്  വെബ് സൈറ്റുകളും രംഗത്ത്‌ വന്നു. കൂടെ  Count Down ഉം ആരംഭിച്ചു .
Count Down ഇവിടെ Click യാല്‍  കാണാം..

തകര്‍ന്നു പൊടിയുന്ന  പ്രവചനങ്ങള്‍ 
ഒരു ചുക്കും സംഭവിക്കാന്‍ പോകുന്നില്ല .ഇങ്ങനെ പലരും പ്രവചിച്ചു മണ്ണായിപ്പോയി .എന്നിട്ടും ആരും പാഠങ്ങള്‍ പഠിക്കാത്തത് എന്തേ ?
മനുഷ്യന്റെ ആധി(വെപ്രാളം) ചൂഷണം ചെയ്യാന്‍ വളരെ എളുപ്പമാണ് .അത് പോലെ തന്നെ വിശ്വാസവും .പുരാതന ചരിത്രം മുതല്‍ പലരും ഇങ്ങനെ പ്രവചിച്ചു നോക്കി. ആധുനിക ലോക ചരിത്രത്തില്‍ തന്നെ  ഇങ്ങനെ ലോകാവസാനം പ്രവചിച്ച പലരെയും നമുക്ക് കാണാം..

ഹെര്‍ബെര്‍ട്ട് ആംസ്ട്രോഗ് :എന്നയാള്‍ ആദ്യം ലോകാവസാനം 1936 -ല്‍ എന്ന് പറഞ്ഞു.അന്ന് നടന്നില്ല. പിന്നെ പറഞ്ഞു  1943 -ല്‍ .അതും നടന്നില്ല.പിന്നെ പറഞ്ഞു 1972 -ല്‍ അതും നടന്നില്ല പിന്നെ 1975 എന്ന് പറഞ്ഞു. അതും നടന്നില്ല .കാരണം അത് അറിയാന്‍ നാം ഇപ്പോള്‍ ഇവിടെ ഉണ്ട് എന്ന് തന്നെയാണ് അതിന്റെ തെളിവ്.

യഹോവാ സാക്ഷികള്‍ :1941 -ല്‍ ലോകാവസാനം എന്ന് പറഞ്ഞു .അന്ന് നടന്നില്ല.പിന്നെ 1984 -ല്‍ എന്നായി അതും നടന്നില്ല.

1994-ല്‍ കാംപിംഗ് (Harold Camping) മൂന്നു പ്രവചനം  നടത്തി.ഒന്നും നടന്നില്ല .പിന്നെ 2011 -ല്‍  ഒരു മഹാ ഭൂകമ്പത്തോടെ   ലോകം അവസാനിക്കും എന്ന് പറഞ്ഞു. അതും നടന്നില്ല.

1997 ആപ്പിള്‍വൈറ്റ് (Marshall Applewhite) എന്നയാളുടെ നേത്രത്വത്തില്‍ ഹെവന്‍സ് ഗേറ്റ് (Heavens Gate )കള്‍ട്ടിന്റെ 38 അംഗങ്ങള്‍ ലോകാവസാനം ഭയന്ന് ഈ ലോകംവിട്ടു പോകാനായി കൂട്ട ആത്മഹത്യ ചെയ്തു. അവര്‍ പോയി എന്നല്ലാതെ ലോകം അവസാനിച്ചില്ല.

ആകാശത്തില്‍ നിന്നും ഇറങ്ങുന്ന കിംഗ്‌ ഓഫ് ടെറര്‍ (King of Terror ) എന്ന നോസ്ടര്‍ഡാമിന്റെ മറ്റൊരു പ്രവചനത്തെ അടിസ്ഥാനമാക്കി 1999 -ല്‍ ലോകം അവസാനിക്കും എന്ന് പറഞ്ഞു ചിലര്‍ രംഗത്ത് വന്നു.  അതും പൊളിഞ്ഞു.  

2000 -ല്‍ എല്ലാം അവസാനിക്കുമെന്നു പറഞ്ഞു. ചിലര്‍  ക്രിസ്തുവിന്റെ രണ്ടാം വരവ് ഉണ്ടാകും എന്നും ചിലര്‍ ദൈവരാജ്യം വരുന്നു എന്നും പറഞ്ഞു ക്രിസ്ത്യന്‍ സംഘങ്ങളും രംഗത്ത്‌ വന്നു .

2000 ജനുവരി ഒന്നിന്നു ഉഗാണ്ടയില്‍  തടിച്ചു കൂടിയ ചില അന്ധവിശ്വാസികള്‍  ലോകാവസാനം നടക്കാത്തതില്‍ നിരാശരായി  തീ കൊളുത്തി മരിച്ചു എന്ന് പറയപ്പെടുന്നു.(778 പേര്‍ മരണ മടഞ്ഞു.)

ഗോള്‍ഡന്‍  ഡൌണ്‍ (Golden Dawn) എന്ന സന്ന്യാസി ഗ്രൂപ്പ്‌  പറഞ്ഞു ലോകം 2010 ഓടെ അവസാനിക്കും എന്ന്.ഇല്ല ഒന്നും നടന്നില്ല
ഇപ്പോള്‍ ഇതാ നാസയുടെ ഒരു പ്രവചനം മുന്നില്‍ വെച്ച്  21/12/2012 ന്നു ലോകം അവസാനിക്കും എന്ന്  പലരും പറയുന്നു.എന്നാല്‍ നാസ തന്നെ ഇക്കാര്യം നിഷേധിച്ചിട്ടുണ്ട് .

ഭാവി പ്രവചനങ്ങള്‍ 
ജൂതരുടെ നിയമ പുസ്തകമായ തല്‍മൂദിന്റെ അടിസ്ഥാനത്തില്‍ 2240 ല്‍ ലോകം അവസാനിക്കും എന്ന് ചില ജൂത ഗ്രൂപ്പുകള്‍ പ്രവചിക്കുന്നു.
അപ്പോള്‍ മുസ്ലികളും വിട്ടു കൊടുക്കില്ലല്ലോ ??അവരിലും ചിലര്‍ പറഞ്ഞു വെച്ചത് നോക്കൂ ...
സയ്യെദ് നൂര്‍സി  എന്നയാള്‍  ഹദീസും ഖുറാന്‍ വ്യഖ്യാനങ്ങളും  വെച്ച് പ്രവചിച്ചു  2129 ലോകം അവസാനിക്കും.
റാഷിദ്  ഖലീഫയും വിട്ടില്ല തന്റെ ഖുറാന്‍ കോഡ് പ്രകാരം അദ്ദേഹം ഇങ്ങനെയും പ്രവചിച്ചു :ലോകാവസാനം 2280 ല്‍ .

ലോകാവസാനം ഉണ്ടാകുമോ ??
ആധുനിക ശാസ്ത്രം തന്നെ സ്ഥിരീകരിച്ച വസ്തുതയാണ്  നാം ജീവിക്കുന്ന ഈ ഭൂമിയും സകല സകല ഗോളങ്ങളും ഒരു നാള്‍ തകര്‍ന്നു തരിപ്പണമാകാം എന്ന് .

ഒരു ബിഗ്‌ ബാങ്ങ് ഉണ്ടായതുപോലെ ഒരു ബിഗ്‌ ക്രഞ്ചും  ഉണ്ടാകാന്‍ സാധ്യതയുണ്ട്.പക്ഷെ അത് എന്ന് സംഭവിക്കും എന്ന് ഒരു ശാസ്ത്രജ്ഞനും അറിയില്ല..അനേകായിരമോ ലക്ഷമോ വര്‍ഷങ്ങള്‍ എടുത്തേക്കാം എന്ന്   ചിലര്‍ പറയുന്നു.
 



ഖുറാന്‍ പറയുന്നു :
ഭൂമി 
"ഭൂമി അതിശക്തിയായ പ്രകമ്പനത്താല്‍  വിറകൊണ്ടാല്‍ ,
ഭൂമി അതിന്റെ ഭാരങ്ങള്‍ പുറംതള്ളിയാല്‍ ,
 
മനുഷ്യന്‍ ചോദിക്കും: അതിനെന്തു പറ്റി?"
( അദ്ധ്യായം 99, അല്‍ സല്‍സല:1,2,3)  
"ഭൂമി പരത്തപ്പെടുമ്പോള്‍ 
അതിനകത്തുള്ളതിനെ പുറത്തേക്ക് തള്ളുകയും അത് ശൂന്യമായിത്തീരുകയും."
 (അദ്ധ്യായം 84,അല്‍  ഇന്‍ഷിഖാക്:3,4 )
"കുഴിമാടങ്ങള്‍ കീഴ്മേല്‍ മറിയുമ്പോള്‍ ,"
 (അദ്ധ്യായം 82 ഇന്‍ഫിത്വാര്‍ :4)
 ആകാശം 
ആകാശം പൊട്ടി പിളരുമ്പോള്‍ ,
നക്ഷത്രങ്ങള്‍ കൊഴിഞ്ഞു വീഴുമ്പോള്‍ .

(അദ്ധ്യായം 82,അല്‍ ഇന്‍ഫിത്വാര്‍ :1,2)
സൂര്യന്‍ 
 സൂര്യന്‍ ചുറ്റിപ്പൊതിയപ്പെടുമ്പോള്‍ ,
നക്ഷത്രങ്ങള്‍ ഉതിര്‍ന്നു വീഴുമ്പോള്‍ ,
പര്‍വ്വതങ്ങള്‍ സഞ്ചരിപ്പിക്കപ്പെടുമ്പോള്‍ ,
പൂര്‍ണ്ണഗര്‍ഭിണികളായ ഒട്ടകങ്ങള്‍ അവഗണിക്കപ്പെടുമ്പോള്‍ ,
വന്യമൃഗങ്ങള്‍ ഒരുമിച്ചുകൂട്ടപ്പെടുമ്പോള്‍ ,
സമുദ്രങ്ങള്‍ ആളിക്കത്തിക്കപ്പെടുമ്പോള്‍ ,
ആത്മാവുകള്‍ കൂട്ടിയിണക്കപ്പെടുമ്പോള്‍ ,
 (അദ്ധ്യായം 81,അത്തക് വീര്‍ :1-7)
സമുദ്രം
"പര്‍വ്വതങ്ങള്‍ പോലുള്ള തിരമാല അവരെ മൂടിക്കളഞ്ഞാല്‍ "(അദ്ധ്യായം 31, ലുഖ്മാന്‍ 32 )

"കടലുകള്‍ കര തകര്‍ത്തൊഴുകുമ്പോള്‍ "(അദ്ധ്യായം 82,അല്‍ ഇന്‍ഫിത്വാര്‍:3) 
മനുഷ്യന്‍ 
"ഭയങ്കര സംഭവം!
എന്താണാ ഭയങ്കര സംഭവം?
ആ ഭയങ്കര സംഭവം ഏതെന്ന് നിനക്കെന്തറിയാം?
അന്ന് മനുഷ്യര്‍ ചിന്നിച്ചിതറിയ പാറ്റപോലെയാകും.
പര്‍വതങ്ങള്‍ കടഞ്ഞ കമ്പിളി രോമം പോലെയും.
അപ്പോള്‍ ആരുടെ തുലാസിന്റെ തട്ട് കനം തൂങ്ങുന്നുവോ,
അവന് സംതൃപ്തമായ ജീവിതമുണ്ട്." 
(അദ്ധ്യായം 101,അല്‍  ഖാരിഅ  :1-7)

ലോകാവസാനം എപ്പോള്‍ ??
ഇന്ന് വരെ ജനിച്ചു വീണ ഒരു മനുഷ്യന്നും  അത് അറിയില്ല. ഇനിയൊട്ടു അറിയുകയുമില്ല.
"ജനം അന്ത്യദിനത്തെപ്പറ്റി നിന്നോടു ചോദിക്കുന്നു. പറയുക: "അതേക്കുറിച്ച അറിവ് അല്ലാഹുവിങ്കല്‍ മാത്രമേയുള്ളൂ." (നബിയേ) അതേപ്പറ്റി നിനക്കെന്തറിയാം? ഒരുവേള അത് വളരെ അടുത്തുതന്നെയായേക്കാം."(ഖുര്‍ആന്‍ അദ്ധ്യയം 33,അല്‍  അഹ്സാബ് : 63) 

"ആ അന്ത്യസമയം സംബന്ധിച്ച അറിവ് അല്ലാഹുവിങ്കല്‍ മാത്രമാണുള്ളത്. അവന്‍ മഴ വീഴ്ത്തുന്നു. ഗര്‍ഭാശയങ്ങളിലുള്ളതെന്തെന്ന് അറിയുന്നു. നാളെ താന്‍ എന്തു നേടുമെന്ന് ആര്‍ക്കും അറിയില്ല. ഏതു നാട്ടില്‍ വെച്ചാണ് മരിക്കുകയെന്നും അറിയില്ല. അല്ലാഹു എല്ലാം അറിയുന്നവനാണ്. സൂക്ഷ്മജ്ഞനും."(ഖുര്‍ആന്‍ ,അദ്ധ്യായം 31,ലുഖ്മാന്‍: 34)
മുഹമ്മദ്‌ നബിയോട് പറയാന്‍ കല്പിക്കുന്നു :
"പറയുക: “ഉറപ്പായും ഞാനെന്റെ നാഥനില്‍ നിന്നുള്ള വ്യക്തമായ പ്രമാണം മുറുകെപ്പിടിക്കുന്നവനാണ്. നിങ്ങളോ അതിനെ തള്ളിപ്പറഞ്ഞവരും. നിങ്ങള്‍ തിരക്കുകൂട്ടിക്കൊണ്ടിരിക്കുന്ന അക്കാര്യം(അന്ത്യ സമയം)എന്റെ വശമില്ല. വിധിത്തീര്‍പ്പിനുള്ള സമസ്താധികാരവും അല്ലാഹുവിനു മാത്രമാണ്."(ഖുര്‍ആന്‍ അദ്ധ്യായം 6, അല്‍ അന്‍ആം:57)

2012, ഡിസംബർ 8, ശനിയാഴ്‌ച

മീരാ ഭായിയും ലൈലാ മജ്നുവും: ആത്മീയതയുടെ അങ്ങേയറ്റം എവിടെ ??

                                                      -Abid ali Padanna
സ്നേഹം ,പ്രേമം ,ആത്മീയത 
നമുക്ക് എല്ലാവരോടും സ്നേഹമുണ്ട് .ചിലരോട് നമുക്ക് കൂടുതലും.എന്നാല്‍ ഈ സ്നേഹം പ്രേമമാവുകയും ,പ്രേമം പരിധി വിടുകയും ചെയ്താലോ? അത് നിങ്ങളുടെ സ്വത്തത്തെ തന്നെ മറപ്പിക്കുകയോ നശിപ്പിക്കുകയോ ചെയ്യുന്ന തരത്തില്‍ ആയാലോ??സൂക്ഷ്മ നിരീക്ഷണത്തില്‍ നമ്മുടെ സമൂഹത്തില്‍ രണ്ടു രീതിയില്‍ ഇത് നിങ്ങള്‍ക്ക് കാണാം .തല്‍ക്കാലം ഈ പരിധി വിടുന്ന ഈ പ്രേമത്തിനെ നമുക്ക് ആദ്യാത്മികത എന്ന് വിളിക്കാം .

ആദ്യാത്മിക രണ്ടെണ്ണത്തില്‍ ഉണ്ട്....
1 .പ്രേമത്തില്‍ : 

പ്രിയതമയോടുള്ള അല്ലെങ്കില്‍ പ്രിയതമനോടുള്ള  അടങ്ങാത്ത പ്രേമം സ്വത്ത ബോധം നഷ്ടപ്പെടുത്തുകയും എന്ത് ത്യാഗവും സഹിക്കുവാനും മരണം വരെ വരിക്കുവാനും തയ്യാറാകുന്ന രീതിയില്‍ എത്തിച്ചേക്കാം.ഇതിനെ പ്രേമത്തിലെ ആധ്യാത്മീകത എന്ന് പറയാം.
ഇതിന്റെ ഉദാഹരണമായി ലൈലാ- (ഖൈസ് )മജ്നു , സലിം- അനാര്‍ക്കലി ,ഹീര്‍ -റഞ്ച  ,റോമിയോ-ജൂലിയറ്റ് തുടങ്ങിയ അനശ്വര പ്രേമത്തിന്റെ പ്രതീകങ്ങളെ എടുക്കാം . ഇതിന്റെ ഔട്ട്‌ പുട്ട് എന്നത് ഒന്ന്) ,സമൂഹത്തിനു  നീണ്ട മഹാ  പ്രേമ കാവ്യങ്ങള്‍ ലഭിച്ചേക്കാം,രണ്ടു)ഇതില്‍ പെടുന്നവര്‍ മാനസിക നില തകരാറില്‍ ആവുകയോ സ്ഥിര ബുദ്ധി നീങ്ങിപ്പോവുകയോ ചെയ്യാം .
2 .ഭക്തിയില്‍  :

ദൈവത്തോടുള്ള സ്നേഹം പ്രേമമായി മാറുകയും അവസാനം അത് സ്വബോധം നഷ്ടപ്പെടുത്തുകയും  ചെയ്യുന്ന അവസ്ഥ. ഇതിനു ഉദാഹരണമാണ് മീര ഭായി ,റാബിയ അല്‍ അദബിയ്യ തുടങ്ങിയവര്‍.
ഇതിന്റെയും ഔട്ട്‌ പുട്ടായി  സമൂഹത്തിനു മഹാ ഭക്തി കാവ്യങ്ങള്‍ ലഭിച്ചേക്കാം,അത് പോലെ ഇക്കൂട്ടര്‍ക്ക് സ്ഥല കാല ബോധം നഷ്ടപ്പെട്ടേക്കാം. 

ഇവിടെ രണ്ടിന്റെയും ഔട്ട്‌ പുട്ട് ശ്രദ്ധിക്കുക രണ്ടും ഒരു പോലെയാണ്.

ഈ രണ്ടു രീതിയും ശാശ്വതമായ സത്യമല്ല .ഇതിന്നായി പരിശ്രമിക്കല്‍ നമ്മുടെ ജീവിത ലക്ഷ്യവും അല്ല .ഇനി ആരെങ്കിലും ഈ വഴികളില്‍ വീണു പോയെങ്കില്‍ അവരെ ആ വഴിക്ക് വിടുക മാത്രം ചെയ്യുക .



സന്ന്യാസി ,പുണ്യാളന്‍ ,ഔലിയ
ദൈവത്തിന്റെ സത്തയെ കണ്ടെത്തുക,അതില്‍ നിര്‍വൃതി കൊള്ളുക, അങ്ങിനെ അവസാനം  ദൈവത്തില്‍ ലയിക്കുക ഇതാണ് ആത്മീയത എന്ന് കേള്‍ക്കുമ്പോള്‍ നമ്മുടെ മനസ്സില്‍ ആദ്യം ഓടി എത്തുന്ന സങ്കല്‍പം.എന്നാല്‍ ഇതിനെ നമുക്ക് ആത്മീയത തേടിയുള്ള അലച്ചില്‍ (സന്ന്യാസി ,സൂഫി )(mystic)എന്ന് പറയാം.
ഭൌതിക വിരക്തി പൂണ്ട് സമൂഹത്തില്‍ നിന്ന് മാറി അകന്നു മലകളിലോ കാടുകളിലോ പോയി തപസ്സിലോ ,ആരാധനകളിലോ മുഴുകി കാലം കഴിക്കുക.പൊതുവില്‍ ആഹാരം വര്‍ജ്ജിക്കുക(കഠിന വ്രതം) ,വിവാഹം കഴിക്കാതിരിക്കുക(ബ്രഹ്മചര്യം) തുടങ്ങിയവ ആചരിക്കുന്നതിനെയും നാം ആത്മീയതയായി തെറ്റിദ്ധരിക്കാറുണ്ട് .

അവിടുന്നും മുന്നോട്ടു പോയാല്‍ നമ്മുടെ ധാരണ ഇങ്ങനെ വായിക്കാം....:
ഒരാള്‍ ദൈവത്തിന്റെ സത്തയില്‍ പരിപൂര്‍ണ്ണമായി ലയിച്ചാല്‍ അവന്‍ സ്വയം ദൈവം ആയി മാറുന്നു.ഇതിനെ അഹം ബ്രഹ്മാസ്മി എന്ന് ഇന്ത്യന്‍ Mysticism ലും അനല്‍ ഹക് എന്ന് സൂഫീ ചിന്തയിലും പറയുന്നു.ഈ ഘട്ടത്തില്‍ ഒരാള്‍ എത്തിയാല്‍ അയാള്‍ നല്ലൊരു ടെലിവിഷനോ ഒരു റേഡിയോയോ ആയി മാറും എന്ന് സമൂഹം കരുതുന്നു.കാരണം അയാള്‍ക്ക്‌ ദൂരെയുള്ള കാര്യങ്ങള്‍ കാണാനും(വിഷ്വല്‍ വിഷന്‍ ),വിദൂരമായ സംഭാഷണങ്ങള്‍ കേള്‍ക്കാനും സാധിക്കുമത്രേ. അത് പോലെ മറഞ്ഞ കാര്യങ്ങള്‍ പറഞ്ഞു കൊടുക്കുക ,രോഗങ്ങള്‍ ഭേദപ്പെടുത്തി കൊടുക്കുക ,പ്രവചനങ്ങള്‍ നടത്തുക ,നമ്മുടെ മനസ്സിലുള്ളത് പറയുക,തുടങ്ങിയ കാര്യങ്ങള്‍ കൂടിയായാല്‍ പിന്നെ അത് പൂര്‍ണ്ണതയില്‍ എത്തി .
ഇങ്ങനെ ഉള്ളവരെ നമ്മുടെ മത സമൂഹങ്ങള്‍ വിളിക്കുന്ന പേരാണ് സന്ന്യാസി ,പുണ്യാളന്‍ ,ഔലിയ തുടങ്ങിയ പദങ്ങള്‍ .അപ്പോള്‍ ഭാവി അറിയുക എന്നതാണ്  ഇതിന്റെ ആകെ തുക .ഇങ്ങനെ വരുമ്പോള്‍ ഇതിന്റെ രത്ന ചുരുക്കം ഇതാണ്.  ആത്മീയതയുടെ അറ്റം എന്നത് ഭാവി അറിയുക എന്നതായി വരുന്നു .
എന്താണ് ആത്മീയത ?

ആരാധനകളിലെ  ആത്മീയതയും ഭൌതീകതയും
ആരാധനകള്‍ സാധാരണ നാം ആത്മീയതയായി മനസ്സിലാക്കുന്നു ,എന്നാല്‍ നിങ്ങള്‍ ദൈവത്തിനോ, പുണ്യാളന്‍മാര്‍ക്കോ കൈക്കൂലി കൊടുത്തു കൊണ്ട് നിങ്ങളുടെ കാര്യം സാധിക്കാന്‍ ചെന്ന് തോഴുതുന്നത് ആരാധനയോ ആത്മീയ പ്രവര്‍ത്തനമോ അല്ല .വെറും ഭൌതീകമായ കച്ചവടം മാത്രമാണ് .ദൈവത്തിന്നു നിങ്ങളുടെ കാശോ സ്വര്‍ണ്ണമോ ,ഭക്ഷണ സാധനങ്ങളോ ആവശ്യമില്ല.ദൈവത്തിന്നും മനുഷ്യനും ഇടയില്‍ പണം ഒരു മുഖ്യ ഘടകമായി വരുന്നത് പൌരോഹിത്യത്തിന്റെ ലക്ഷണമാണ്.പൌരോഹിത്യ ആചാരങ്ങള്‍ക്ക് ആത്മീയതയില്ല.വെറും സാമ്പത്തിക ലാഭം മാത്രം.
തപസ്സും ബ്രഹ്മചര്യയും ആത്മീയതയല്ല 

മുഹമ്മദ്‌ നബിയെ കാണാന്‍ വന്ന മൂന്നു പേര്‍ :
 അനസ്(റ) പറയുന്നു: മൂന്നുപേര്‍ നബി(സ)യുടെ ആരാധനാ സമ്പ്രദായങ്ങളന്വേഷിച്ചുകൊണ്ട് നബിയുടെ ഭാര്യമാരുടെ വീട്ടില്‍ വന്നു. നബിയുടെ ആരാധനയെക്കുറിച്ച് കേട്ടപ്പോള്‍ അവര്‍ക്കതു വളരെ കുറഞ്ഞു പോയെന്ന് തോന്നി. അവര്‍ പറഞ്ഞു: നാമും നബിയും എവിടെ? നബി ക്ക് ആദ്യം ചെയ്തുപോയതും പിന്നീട് ചെയ്തു പോയതുമായ എല്ലാ പാപങ്ങളും അല്ലാഹു പൊറുത്തുകൊടുത്തിട്ടുണ്ടല്ലോ. അങ്ങിനെ മറ്റൊരാള്‍ പറഞ്ഞു: ഞാന്‍ എന്നും രാത്രി മുഴുവന്‍ നമസ്കരിക്കും. മറ്റൊരാള്‍ പറഞ്ഞു: എല്ലാ ദിവസവും ഞാന്‍ നോമ്പ് പിടിക്കും. ഒരു ദിവസവും നോമ്പ് ഉപേക്ഷിക്കുകയില്ല. മൂന്നാമന്‍ പറഞ്ഞു: ഞാന്‍ സ്ത്രീകളില്‍ നിന്നകന്ന് നില്‍ക്കും. ഒരിക്കലും വിവാഹം കഴിക്കുകയില്ല. നബി അവിടെ വന്നു. വിവരം അറിഞ്ഞപ്പോള്‍ അരുളി: നിങ്ങള്‍ ഇന്നതെല്ലാം പറഞ്ഞുവല്ലോ. അല്ലാഹു സത്യം. നിങ്ങളെക്കാളെല്ലാം അല്ലാഹുവിനെ ഭയപ്പെടുന്നവരും അവനെ സൂക്ഷിക്കുന്നവനുമാണ് ഞാന്‍. ഞാന്‍ ചിലപ്പോള്‍ നോമ്പനുഷ്ഠിക്കുകയും ചിലപ്പോള്‍ നോമ്പ് ഉപേക്ഷിക്കുകയും ചെയ്യും. രാത്രി നമസ്കരിക്കുകയും ഉറങ്ങുകയും ചെയ്യും. സ്ത്രീകളെ വിവാഹം കഴിക്കുകയും ചെയ്യും. വല്ലവനും എന്റെ നടപടി ക്രമങ്ങളെ വെറുക്കുന്ന പക്ഷം അവന്‍ എന്റെ സമൂഹത്തില്‍പ്പെട്ടവനല്ല തന്നെ. (ബുഖാരി. 7. 62. 1)
അപ്പോള്‍ എന്താണ് ആത്മീയത ?

ലഭേച്ചയില്ലാതെ ആരാധനകള്‍ നിര്‍വ്വഹിക്കുക എന്നതിനെ നമുക്ക് ആത്മീയതയില്‍ പെടുത്താം.ദൈവത്തിനോടുള്ള ബന്ധത്തോടൊപ്പം മനുഷ്യ ബന്ധങ്ങളും മാനിക്കുക ,
ദൈവത്തോടുള്ള അവകാശത്തോടൊപ്പം മനുഷ്യനോടുള്ള അവകാശവും പാലിക്കുക ,
ദൈവ സ്നേഹം നില നിര്‍ത്തുന്നതോടപ്പം മനുഷ്യ സ്നേഹം നിലനിര്‍ത്തുക  എന്നതാണ് ആത്മീയതയുടെ ചുരുക്കം
ആത്മീയത എന്ന് പറയുന്നത് കാട്ടിലേക്ക് ഒളിച്ചു പോകലല്ല.
ഖുര്‍ആന്‍ പറയുന്നു :
"1-മതത്തെ നിഷേധിക്കുന്നവനെ നീ കണ്ടോ? 
2-അത് അനാഥയെ ആട്ടിയകറ്റുന്നവനാണ്. 
3-അഗതിയുടെ അന്നം കൊടുക്കാന്‍ പ്രേരിപ്പിക്കാത്തവനും. 
4-അതിനാല്‍ നമസ്കാരക്കാര്‍ക്ക് നാശം! 
5-അവരോ, തങ്ങളുടെ നമസ്കാര കാര്യത്തില്‍ അശ്രദ്ധരാണ്. 
6-അവര്‍ ആളുകളെ കാണിക്കാന്‍ വേണ്ടി ചെയ്യുന്നവരാണ്. 
7-നിസ്സാരമായ സഹായം പോലും മുടക്കുന്നവരും." 
(ഖുറാന്‍ ,107, അല്‍ മാഊന്‍ )
അഗതിക്ക് ഭക്ഷണം നല്‍കുക ,അനാഥയെ സംരക്ഷിക്കുക ,മനുഷ്യര്‍ക്ക്‌ ചെറു സഹായങ്ങള്‍ നല്‍കുക തുടങ്ങിയവ ആത്മീയ പ്രവര്‍ത്തനമായും ,ജനങ്ങള്‍ കാണാന്‍ ചെയ്യുന്ന കാപട്യമുള്ള ആരാധനാ കര്‍മങ്ങള്‍ ആത്മശൂന്യമാണെന്നും മേല്‍ വാക്യം കൃത്യമായി പഠിപ്പിക്കുന്നു.

"ഓര്‍ക്കുക: ഇസ്രയേല്‍ മക്കളില്‍നിന്ന് നാം ഉറപ്പുവാങ്ങി: ഏക ദൈവത്തെ അല്ലാതെ  നിങ്ങള്‍ വഴിപ്പെടരുത്; മാതാപിതാക്കളോടും അടുത്ത ബന്ധുക്കളോടും അനാഥകളോടും അഗതികളോടും നല്ല നിലയില്‍ വര്‍ത്തിക്കണം; ജനങ്ങളോട് നല്ലതു പറയണം; നമസ്കാരം നിഷ്ഠയോടെ നിര്‍വഹിക്കണം; സകാത്ത് നല്‍കണം. പക്ഷേ, പിന്നീട് നിങ്ങള്‍ അവഗണനയോടെ പിന്തിരിഞ്ഞുകളഞ്ഞു; നിങ്ങളില്‍ അല്പം ചിലരൊഴികെ."(അല്‍ ബഖറ :83)
ആത്മീയതയുടെ അങ്ങേ അറ്റം എന്താണ് ?
യാതൊരു പ്രതിഫലവും ആഗ്രഹിക്കാതെ,നിസ്വാര്‍ത്ഥമായി നിഷ്കളങ്കമായി ഒരു നന്ദി വാക്ക്  പോലും ആഗ്രഹിക്കാതെ മറ്റുള്ളവര്‍ക്ക് ഭക്ഷണം നല്‍കുക ,ധനം കൊണ്ട് സഹായിക്കുക. ഇങ്ങനെ നിങ്ങള്‍ക്ക് സാധിക്കുമെങ്കില്‍ നിങ്ങള്‍ ആത്മീയതയുടെ അങ്ങേയറ്റം കണ്ടു എന്ന് പറയാം. 
ഈ വാചകം അത് കൃത്യമായി അടയാളപ്പെടുത്തുന്നു. 
"ആഹാരത്തോട് ഏറെ പ്രിയമുള്ളതോടൊപ്പം അവരത് അഗതിക്കും അനാഥക്കും ബന്ധിതന്നും നല്‍കുന്നു. അവര്‍ പറയും: "അല്ലാഹുവിന്റെ പ്രീതിക്കുവേണ്ടി മാത്രമാണ് ഞങ്ങള്‍ നിങ്ങള്‍ക്ക് അന്നമേകുന്നത്. നിങ്ങളില്‍നിന്ന് എന്തെങ്കിലും പ്രതിഫലമോ നന്ദിയോ ഞങ്ങള്‍ പ്രതീക്ഷിക്കുന്നില്ല."ഞങ്ങളുടെ നാഥനില്‍ നിന്നുള്ള ദുസ്സഹവും ഭീകരവുമായ ഒരു നാളിനെ ഞങ്ങള്‍ ഭയപ്പെടുന്നു.” (അല്‍ ഇന്‍സാന്‍ : 8-10)

ചുരുക്കി :
നിഷ്കളങ്കമായ പര സഹായം ആത്മീയതയുടെ അങ്ങേഅറ്റമാണ് എന്ന് ഇതിലൂടെ നമുക്ക് മനസ്സിലാക്കാം
ഇനി നിങ്ങള്‍ വലിയ ഒരു മത ഭക്തനാണ് .ആരാധനകളില്‍ സ്ഥിരം മുഴുകും ,എന്നാല്‍ ധനം പാവപ്പെട്ടവര്‍ക്ക് നല്‍കാന്‍ നിങ്ങള്‍ തയാറല്ല .ഒരു നേരത്തെ ഭക്ഷണം കൊടുക്കാന്‍ നിങ്ങള്ക്ക് മനസ്സില്ല. എങ്കില്‍ നിങ്ങളുടെ മതവും കപടമാണ് .നിങ്ങളുടെ ആത്മീയതയും കപടമാണ്. ഭക്ഷം മറന്നുള്ള ഭക്തി സത്യത്തില്‍ നിന്നും ഏറെ അകലെയാണ് എന്നറിയുക. അത്പോലെ അന്യന്റെ ഭക്ഷണം കവരുന്ന ഭക്തി, കപടവും മാനവ വിരുദ്ധവുമാകുന്നു. 

രാഷ്ട്രീയത്തിലെ ആത്മീയത
ആത്മീയതയെ രാഷ്ട്രീയ പ്രവര്‍ത്തനത്തിന്റെ അടിത്തറയായി കണ്ട ഇന്ത്യയിലെ രണ്ടു മഹാ വ്യക്തിത്വങ്ങളാണ് ഗാന്ധിജിയും  അരബിന്ദ ഘോഷും.ഇന്ത്യന്‍ സ്വാതന്ത്ര സമര രംഗത്ത്‌ രണ്ടു പേരും സജീവമായിരുന്നു.അപ്പോള്‍ നിസ്വാര്‍ത്ഥമായ രാഷ്ട്രീയ പ്രവര്‍ത്തനവും യഥാര്‍ത്ഥത്തില്‍ ആത്മീയതാണ് എന്ന് നമുക്ക് പറയാം .
മതം വളരുന്നുണ്ടോ ???
നമ്മുടെ നാട്ടില്‍ ഉത്സവങ്ങള്‍ക്കും ഉറൂസിന്നും പള്ളിപെരുന്നാളിന്നും ജന ബാഹുല്ല്യം കൂടുന്നു എന്നതിനര്‍ത്ഥം മതം വളരുന്നു എന്ന് ആരെങ്കിലും തെറ്റിദ്ധരിക്കുന്നുവെങ്കില്‍ അവര്‍ വിഡ്ഢികളുടെ സ്വര്‍ഗ്ഗത്തിലാകുന്നു .സത്യത്തില്‍ അവിടെ വളരുന്നത്‌ പുരോഹിതന്മാരുടെ ഖജനാവുകളാണ്. മതത്തെ പൊരൊഹിത്യത്തിന്റെ ഉരുക്ക് മുഷ്ടിയില്‍ നിന്ന്  രക്ഷിക്കുക എന്നതാണ് ഈ കാഘട്ടം നമ്മോടു ആവശ്യപ്പെടുന്ന ആത്മീയത . അതാണ്‌ നാം നിര്‍വ്വഹിക്കേണ്ട ഒരു സുപ്രധാന ദൌത്യം.

2012, ഡിസംബർ 5, ബുധനാഴ്‌ച

ശ്രീരാമന്‍ മുതല്‍ മുഹമ്മദ്‌ നബി വരെ :സംഭവങ്ങളിലെ സാമ്യതകള്‍

                                                                 -Abid Ali Padanna

അറിവില്ലായ്മയാണ് നമ്മുടെ എല്ലാ പ്രശ്നങ്ങള്‍ക്കും കാരണം.നാം അറിവ് നേടാന്‍ സ്വയം തയ്യാറാകുന്നില്ലെങ്കില്‍ മറ്റുള്ളവര്‍ നല്‍കുന്ന കുടില ചിന്തകള്‍ സ്വയം വിഴുങ്ങി ഇതര സമൂഹങ്ങളെ  വിദ്വേഷത്തോടെ കാണാന്‍ പ്രേരിപ്പിക്കുന്നു. ഇതില്‍ നിന്ന് രക്ഷപ്പെടാന്‍ നമ്മുടെ മുന്നില്‍ ഉള്ള ഒരു പോംവഴി മതങ്ങളെ കുറിച്ചുള്ള താരതമ്യ പഠനമാണ് .വ്യത്യസ്ത മത ധര്മ്മങ്ങളിലെ നിരവധി സംഭവങ്ങള്‍ തമ്മില്‍ വളരെ കൂടുതല്‍ സാമ്യതകള്‍ കാണുന്നു .ഈ സാമ്യതകള്‍ വെറും യാദ്രിശ്ചികത മാത്രമായി തള്ളാന്‍ സാധിക്കില്ല. ഇതില്‍ സത്യം എവിടെയോ ഒളിഞ്ഞു കിടപ്പുണ്ട്. ഏകമായ ഒരു അന്തര്‍ധാര പല സംഭവങ്ങളിലും നമുക്ക് കാണാം .നമ്മുടെ അന്വേഷണങ്ങള്‍ ഒരു പക്ഷെ നിലവിലുള്ള മത-ധര്‍മ്മങ്ങള്‍ തമ്മിലെ വിടവ് നികത്തുകയും സമൂഹത്തില്‍ ഐക്യവും സമാധാനവും നിലനിര്‍ത്താനും സഹായിച്ചേക്കാം. 
ധര്‍മ്മ യുദ്ധങ്ങള്‍

1)രാമ-രാവണ യുദ്ധം
രാമായണത്തില്‍ ശ്രീരാമന്‍ ലങ്കയിലേക്ക് പോയത് എന്തിന്നു ?? തന്റെ ഭാര്യയെ തട്ടി ക്കൊണ്ട് പോയ ലങ്കാധിപതി രാവണന്റെ കയ്യില്‍ നിന്ന് സീതയെ രക്ഷിക്കാന്‍ തന്നെ .അതിന്നു അദ്ദേഹത്തിന്നു യുദ്ധം ചെയ്യേണ്ടി വന്നു .ചുരുക്കി രണ്ടു രാജ്യങ്ങള്‍ തമ്മിലെ യുദ്ധം .ഇതിനു രാമനെ സഹായിച്ചത് ശത്രുവായ രാവണന്റെ സഹോദരന്‍ വിഭീഷണന്‍ .സഹായിക്കുക മാത്രമല്ല .രാമന്റെ കൂടെ ചേര്‍ന്ന് സഹോദരന്നു എതിരെ യുദ്ധം ചെയ്യുകയും ചെയ്തു.
ചോദ്യം ഇതാണ് :
രാവണന്റെ മതം എന്ത് ? വിഭീഷണന്‍ സ്വന്തം സഹോദരനെ എതിരെ എന്തിന്നു രാമന്റെ കൂടെ നിന്നു?

2)കുരുക്ഷേത്ര യുദ്ധ ഭൂമി
കുരുക്ഷേത്ര യുദ്ധത്തില്‍ ഏറ്റ  മുട്ടിയവര്‍ ആരൊക്കെ ?? എന്തായിരുന്നു അവരുടെ ശത്രുതയ്ക്ക് കാരണം? .ജേഷ്ഠ -അനുജന്‍ മാരായ ധൃതരാഷ്ട്രർ ,പാണ്ഡു  എന്നിവരുടെ മക്കള്‍ എന്തിന്നു വേണ്ടി യുദ്ധക്കളത്തില്‍ ഇറങ്ങി ? കൌരവരും പാണ്ടവരും ജെഷ്ടാനുജന്‍ മാരല്ലേ ? ഇവര്‍ രക്ത ബന്ധുക്കളും ഒരേ കുടുംബക്കാരും അല്ലെ ?
നമ്മുടെ സങ്കല്‍പ്പ പ്രകാരം ഇവരൊക്കെ ഹിന്ദു മതക്കാര്‍ .പിന്നെ ഇവര്‍ തമ്മില്‍ എന്തിന്നു യുദ്ധം ചെയ്തു ?ചോദ്യം പ്രസക്തമാണ് .

3)ബദര്‍ യുദ്ധ രംഗം 
ദി മെസേജ്  എന്ന ഫിലിമിലെ ഒരു രംഗം
നീണ്ട പതിമ്മൂന്നു വര്‍ഷത്തെ നിരന്തര പീഡനതിന്നു ശേഷം പ്രവാചകന്‍ മുഹമ്മദ്‌ നബി സ്വന്തം നാടായ മക്കയില്‍ നിന്ന് 340 കിലോമീറ്റര്‍ അകലെയുള്ള മദീനയിലേക്ക് തന്റെ അനുയായികളെയും കൂട്ടി പലായനം ചെയ്തു. അവിടെയും സ്വസ്ഥമായി ജീവിക്കാന്‍ അനുവദിക്കാതെ യുദ്ധോല്സുകരായി മക്കക്കാര്‍ മുഹമ്മദ്‌ നബിയും കൂട്ടരെയും ആക്രമിക്കാന്‍ പദ്ധതിയുമായി വന്നു .അങ്ങിനെ ഇരുപക്ഷവും മദീനയില്‍ നിന്ന് 130 KM അകലെ  ബദര്‍ ഭൂമിയില്‍ വെച്ച് ഏറ്റു മുട്ടി.ആയിരത്തിലധികം വരുന്ന മക്കന്‍ സൈന്യത്തെ വെറും 313 പേര്‍ മാത്രമുള്ള സൈന്യവുമായി മുഹമ്മദ്‌ നബി ഏറ്റുമുട്ടി.മുഹമ്മദ്‌ നബിയുടെ പക്ഷത് നിന്ന് 14 പേരും ശത്രു പക്ഷത്തില്‍ നിന്ന് 70 പേരും കൊല്ലപ്പെട്ടു.
മുഹമ്മദ്‌ നബിയുടെ എതിരാളികള്‍ തന്റെ ഗോത്രത്തിലും കുടുംബത്തിലും പെട്ടവര്‍ .രക്ത ബന്ധുക്കള്‍ .എന്നിട്ടും എന്ത് കൊണ്ട് യുദ്ധം ചെയ്തു ?


ഇവിടെ ഒരേ ജാതിയിലും കുലത്തിലും കുടുംബത്തിലും ജനിച്ചു എന്നതിനാല്‍ ശത്രുത കാണിക്കതിരിക്കുകയല്ലേ ഇവര്‍ ചെയ്യേണ്ടത് ?പിന്നെ എന്തായിരുന്നു ഇവരുടെ ശത്രുതയ്ക്ക് കാരണം ??
ഉത്തരം :
ശത്രുക്കള്‍ അധര്‍മ്മം പ്രവര്‍ത്തിക്കുന്നവര്‍ ആയിരുന്നു എന്നതാണ് കാരണം .

സ്ത്രീയെ തട്ടിക്കൊണ്ടു പോകുന്നവര്‍ (രാവണന്‍ )  ,സ്ത്രീയുടെ വസ്ത്രമുരിയാന്‍ ശ്രമിക്കുന്നവര്‍ (കൌരവര്‍ )  ,പെണ്‍ കുഞ്ഞുങ്ങളെ ജീവനോടെ കുഴിച്ചു മൂടുന്നവര്‍ (മക്കക്കാര്‍ )  ,മനുഷ്യനെ അരക്കില്ലത്തില്‍ ചുട്ടുകൊല്ലാന്‍ ശ്രമിക്കുന്നവര്‍ ഇവരാണ് മാനവ കുലത്തിന്റെ ശത്രുക്കള്‍ ഇവര്‍ക്ക് എതിരെയുള്ള പ്രവര്‍ത്തനമാണ് ധര്‍മ്മം ....ഇവര്‍ക്കെതിരെയുള്ള സമരമാണ് യുദ്ധം .

അര്‍ജുനനെ വിളിച്ചു കൊണ്ട് ശ്രീ കൃഷ്ണന്‍ പറയുന്നു : 
"യഥാ യഥാഹി ധര്മ്മസ്യ ഗ്ലാനിര്‍  ഭവതി ഭാരതാ അഭ്യുദ്ധാനം അധര്മ്മസ്യ തഥാത്മാനം സ്രിജാമ്യുഹം.  "(ഭഗവത് ഗീത , അദ്ധ്യായം 4 ശ്ളോകം 7)
എപ്പോള് ധര്‍മ്മത്തിനു താഴ്ചയും അധര്‍മ്മത്തിന് ഉയര്ച്ചയും ഉണ്ടാകുന്നുവോ അപ്പോള് ഞാന് ഇറങ്ങി വരുന്നു . 
"പരിത്രാനായ സാധൂനാം വിനാശായ ച ദുഷ്ക്രിതാം ധര്‍മ്മ സംസ്ഥാപ നാര്‍ത്തായ സംഭവാമി യുഗേ യുഗേ "(ഭഗവത് ഗീത , അദ്ധ്യായം 4 ശ്ളോകം 8)
നന്മ പ്രചരിപ്പിക്കാനും തിന്മ ഉച്ചാടനം ചെയ്യാനും ധര്‍മത്തെ പുന:സ്ഥാപിക്കാനും ഞാന്‍ യുഗങ്ങള്‍ തോറും പ്രത്യക്ഷപ്പെടും.
 ഖുര്‍ആന്‍ പറയുന്നു :
"നന്‍മയിലേക്ക്‌ ക്ഷണിക്കുകയും, സദാചാരം കല്‍പിക്കുകയും, ദുരാചാരത്തില്‍ നിന്ന്‌ വിലക്കുകയും ചെയ്യുന്ന ഒരു സമുദായം നിങ്ങളില്‍ നിന്ന്‌ ഉണ്ടായിരിക്കട്ടെ. അവരത്രെ വിജയികള്‍."(ഖുര്‍ആന്‍ ,ആലു ഇമ്രാന്‍: 104)


 "നാം നൂഹിനോടു കല്‍പിച്ചതും നിനക്കു(മുഹമ്മദ്‌)  നാം ദിവ്യബോധനമായി നല്‍കിയതും ഇബ്റാഹീം, മൂസാ, ഈസാ എന്നിവരോടനുശാസിച്ചതുമായ കാര്യം തന്നെ അവന്‍ നിങ്ങള്‍ക്കു ധര്‍മ്മ നിയമമായി നിശ്ചയിച്ചു തന്നിരിക്കുന്നു. “നിങ്ങള്‍ ഈ ധര്‍മത്തെ(ദീന്‍) സ്ഥാപിക്കുക; അതില്‍ ഭിന്നിക്കാതിരിക്കുക”യെന്നതാണത്." (ഖുര്‍ആന്‍, അശൂറ: 13 )

ഇവിടെ ധര്മത്തെ സ്ഥാപിക്കുക എന്ന ഗീതയിലെയും ഖുര്‍ആനിന്റെയും വാചകം ശ്രദ്ധിക്കുക


വിശ്വസിച്ചവരേ, നിങ്ങള്‍ നീതി നടത്തി അല്ലാഹുവിനുവേണ്ടി സാക്ഷ്യം വഹിക്കുന്നവരാവുക. അത് നിങ്ങള്‍ക്കോ നിങ്ങളുടെ മാതാപിതാക്കള്‍ക്കോ അടുത്ത ബന്ധുക്കള്‍ക്കോ എതിരായിരുന്നാലും. കക്ഷി ധനികനോ ദരിദ്രനോ എന്നു നോക്കേണ്ടതില്ല. ഇരുകൂട്ടരോടും കൂടുതല്‍ അടുപ്പമുള്ളവന്‍ അല്ലാഹുവാണ്. അതിനാല്‍ നിങ്ങള്‍ സ്വന്തം ഇഷ്ടാനിഷ്ടങ്ങളുടെ പേരില്‍ നീതി നടത്താതിരിക്കരുത്. വസ്തുതകള്‍ വളച്ചൊടിക്കുകയോ സത്യത്തില്‍നിന്ന് തെന്നിമാറുകയോ ചെയ്യുകയാണെങ്കില്‍ അറിയുക. തീര്‍ച്ചയായും നിങ്ങള്‍ ചെയ്യുന്നതിനെപ്പറ്റിയെല്ലാം സൂക്ഷ്മമായി അറിയുന്നവനാണ് അല്ലാഹു."(ഖുര്‍ആന്‍, അന്നിസാ അ`135)
നൂഹിന്റെ മഹാ പ്രളയവും മനുവും

അത് പോലെ ബൈബിളിലും ഖുരാനിലും പറയുന്ന ഒരു പുരാതന സംഭവമാണ് നോഹ് നബിയുടെ ജീവിതം.സ്വന്തം സമുദായം അദ്ദേഹത്തെ എതിര്‍ക്കുകയും നന്മയുടെ ശത്രുക്കള്‍ ആവുകയും ചെയ്തപ്പോള്‍  ദൈവം നൂഹിനോട് മല മുകളില്‍ കപ്പല്‍ നിര്‍മ്മിക്കാന്‍ ആവശ്യപ്പെടുന്നു .അതിനെയും അവര്‍ പരിഹസിച്ചു .ഒരു മഹാ പ്രളയത്തെ കുറിച്ച് അദ്ദേഹം മുന്നറിയിപ്പ് കൊടുത്തു .അവര്‍ അത് കേള്‍ക്കാന്‍ കൂട്ടാക്കിയില്ല. നോഹ് തന്നില്‍ വിശ്വസിച്ച കുറഞ്ഞ പേരെയും കൊണ്ട് കപ്പലില്‍ കയറി .മഹാ പ്രളയം ആരംഭിച്ചു.മറ്റുള്ളവര്‍ മുഴുവന്‍ മുങ്ങി മരിച്ചു നൂഹിന്റെ ഒരു മകന്‍ അടക്കം .

ഇതേ പ്രളയത്തെ കുറിച്ച് ലോകത്തുള്ള  എല്ലാ പുരാതന ഗ്രന്ഥങ്ങളിലും കാണാം.ഇന്ത്യന്‍ പുരാണങ്ങളില്‍ ഒരു മഹാ പ്രളയത്തെ കുറിച്ച് പറയുന്നുണ്ട് .മനു  ഇങ്ങനെ ഒരു പ്രളയത്തില്‍ നിന്ന് രക്ഷപ്പെട്ടു എന്നും  പറയപ്പെടുന്നു .വിഷ്ണുവിന്റെ അവതാരമായ മത്സ്യം മനുവിനോട്  പ്രളയത്തില്‍ നിന്ന് രക്ഷപ്പെടാനായി കപ്പല്‍ നിര്‍മ്മിക്കാന്‍ ആവശ്യപ്പെടുന്നുണ്ട്.
ആ നിര്‍ദ്ദേശ പ്രകാരം അദ്ദേഹം കപ്പല്‍ നിര്‍മിക്കുകയും രക്ഷപ്പെടുകയും ചെയ്തു .
(മത്സ്യ പുരാണം ,വിഷ്ണു പുരാണം കാണുക )
അത്ഭുത ജനനങ്ങള്‍ :യേശുവും ശ്രീകൃഷ്ണനും    
യേശുവിന്റെ ജനനം പിതാവിന്റെ സാനിധ്യം ഇല്ലാതെ ആയിരുന്നു .യേശു ദൈവത്തിന്റെ വചനത്താല്‍ മര്‍യമിന്റെ വയറ്റില്‍ വളര്‍ന്നു എന്ന് ഖുറാന്‍.
ഇതേ പോലുള്ള ഒരു സംഭവം കൃഷ്ണന്റെ ജനനത്തിലും കാണാം .കൃഷ്ണന്റെ  അമ്മ ദേവകി  ഗര്‍ഭം ധരിക്കുന്നത് വാസുദേവന്റെ നോട്ടം മൂലമാണെന്ന് പുരാണം പറയുന്നു .

ശ്രീ രാമന്‍ ,ശ്രീ കൃഷ്ണന്‍ തുടങ്ങിയവര്‍ ജനിച്ചത്‌ ഉന്നത കുലത്തിലും രാജ വംശത്തിലും ആയിരുന്നു .മുഹമ്മദ്‌ നബിയും അത് പോലെ മക്കയുടെയും കഅബയുടെയും അധികാരികളായ ഖുരൈഷീ ഗോത്രത്തില്‍ ആയിരുന്നു ജനിച്ചത്‌ . മോസ്സാസ് വളര്‍ന്നത്‌ ഫരോവന്റെ കൊട്ടാരത്തില്‍ .പിന്നീട് ഇവരെ എല്ലാവരെയും എതിര്‍ത്തത് അവരുടെ അതെ കുലവും ജനതയും തന്നെ എന്നത് ഒരു യാദ്രിശ്ചികത മാത്രമാണോ ?

ശിശു വധം :ശ്രീകൃഷ്ണനും, മോസസ്സും 
മഥുരയിലെ ക്രൂരഭാരണാധികാരിയായ കംസന്‍ തന്റെ അന്ത്യം സഹോദരി ദേവകിയുടെ എട്ടാമത്തെ മകനാല്‍ ആയിരിക്കും എന്ന പ്രവചനം അറിഞ്ഞു. അതിനാല്‍ അവരുടെ ഓരോ പ്രസവത്തിലും ഉള്ള  ആണ്‍കുഞ്ഞുങ്ങളെ വധിച്ചു കളഞ്ഞു ..

ഫറോവയും അത് തന്നെ ചെയ്തു.ഇസ്രയേല്‍ മക്കളില്‍ ഒരു പുരുഷന്‍ തന്റെ  അന്തകനാകും എന്നാ പ്രവചനത്താല്‍ ഫറോവാന്‍ ഇസ്രയേല്‍ മക്കളിലെ എല്ലാ നവ ജാത പുരുഷ സന്തതികളെയും കൊല ചെയ്തു തുടങ്ങി .

ദേവകിയുടെ ഭര്‍ത്താവ് വാസുദേവന്‍‌ കംസന്റെ ജയില്‍ നിന്ന് അത്ഭുതകരമാം വിധം രക്ഷപ്പെട്ടു. തനിക്കു ലഭിച്ച ആണ്‍ കുഞ്ഞിനെ തലയില്‍ ഏറ്റി രാത്രി തന്നെ  നദി കടന്നു ഗോകുലത്തില്‍ എത്തിച്ചു . അവിടെ തന്റെ സുഹ്രത്തായ നന്ദന്റെ ഭാര്യ യശോധ പ്രസവിച്ച പെണ്‍  കുഞ്ഞിനെയും കൊണ്ട് വാസുദേവന്‍ വീണ്ടും കംസന്റെ ജയിലില്‍ തിരിച്ചു വന്നു .രാവിലെ ജയിലില്‍ വന്നു കംസന്‍ കണ്ടത് പെണ്‍ കുട്ടിയെ ആയതിനാല്‍ കൊല്ലാതെ വിട്ടു കളഞ്ഞു .

 ഇതേ പോലെയാണ് മൂസയുടെ മാതാവ് തന്റെ കുട്ടിയെ  രക്ഷിക്കാന്‍ നൈല്‍  നദിയില്‍ ഒഴുക്കിയത് .നദിക്കരയില്‍ നിന്ന് കുളിക്കുകയായിരുന്ന ഫരോവന്റെ ഭാര്യ കുട്ടിയെ കാണുകയും തന്റെ കൊട്ടാരത്തില്‍ മകനെപ്പോലെ വളര്‍ത്തുകയും ചെയ്തു ....ഈ മകനാണ് പിന്നീട് മോസ്സസ് ആയതും ഫരോവന്റെ അന്ത്യതിന്നു കാരണം ആയതും .

മുഹമ്മദ്‌ നബിയുടെ കാലത്തെ മക്കാ നിവാസികളിലെ ഒരു അനാചാരത്തെ ഖുറാന്‍ എതിര്‍ക്കുന്നത് ഇങ്ങനെ...
"അവരിലൊരാള്‍ക്ക് പെണ്‍കുഞ്ഞ് പിറന്നതായി സന്തോഷവാര്‍ത്ത ലഭിച്ചാല്‍ ദുഃഖത്താല്‍ അവന്റെ മുഖം കറുത്തിരുളും."
"തനിക്കു ലഭിച്ച സന്തോഷവാര്‍ത്തയുണ്ടാക്കുന്ന അപമാനത്താല്‍ അവന്‍ ആളുകളില്‍ നിന്ന് ഒളിഞ്ഞുമറയുന്നു. അയാളുടെ പ്രശ്നം, അപമാനം സഹിച്ച് അതിനെ നിലനിര്‍ത്തണമോ അതല്ല മണ്ണില്‍ കുഴിച്ചുമൂടണമോ എന്നതാണ്. അറിയുക: അവരുടെ തീരുമാനം വളരെ നീചം തന്നെ!"(ഖുറാന്‍ ,അന്നഹ്ല്‍ :58,59) 
ത്രിദേവി ,ത്രി മൂര്‍ത്തി,ട്രിനിറ്റി
ദൈവ സങ്കല്‍പ്പങ്ങളിലും പല സാമ്യതകളും കാണാം.പുരാതന ഇന്ത്യന്‍ വേദങ്ങളിലും ,ബൈബിളിന്റെ പഴയ നിയമങ്ങളിലും ,പുതിയ നിയമങ്ങളുടെ ആദ്യ ഭാഗത്തും ശക്തമായ ഏകദൈവ വിശ്വാസം  ഉദ്ഘോഷിക്കുന്നു .വിഗ്രഹവല്‍ക്കരണം, ബിബപൂജ തുടങ്ങിയവയെ ശക്തമായ ഭാഷയില്‍ വിമര്‍ശിക്കുകയും ചെയ്യുന്നു.

അത് പോലെ ക്രൈസ്ത്രവതയില്‍ പിന്നീട് കണ്ടുവന്ന ട്രിനിറ്റി(ത്രികെയത്വം) സങ്കല്‍പം പുരാണ ഉപനിഷത് കാലത്തെ ഹൈന്തവതയിലെ ചില ദൈവ വിശ്വാസങ്ങള്‍ തമ്മില്‍ സാമ്യത കാണുന്നു.

ദൈവത്തെ മൂന്നായി കാണുന്ന ക്രൈസ്തവ സങ്കല്‍പം ഇങ്ങനെ പിതാവ് ,പുത്രന്‍, പരിശുദ്ധാത്മാവ്.
ദൈവത്തെ ത്രിമൂര്‍ത്തികളായി സങ്കല്പിക്കുന്ന ഹൈന്ദവ സങ്കല്പത്തില്‍  (ബ്രഹ്മാവ്‌(സൃഷ്ടി)  ,വിഷ്ണു(സ്ഥിതി)  ശിവന്‍(സംഹാരം ) എന്നിങ്ങനെ കാണാം .
അത് പോലെ ത്രിദേവി സങ്കല്പവും (സരസ്വതി ,ലക്ഷ്മി ,പാര്‍വതി/കാളി) നമുക്ക് കാണാം .  

എന്നാല്‍ ദൈവത്തെ ഇങ്ങനെ മൂന്നായി കാണുന്നത്  ഖുര്‍ആന്‍ ശക്തായി വിമര്‍ശിക്കുന്നു .

"ദൈവം മൂവരില്‍ ഒരുവനാണെന്ന് വാദിച്ചവര്‍ തീര്‍ച്ചയായും സത്യത്തെ നിഷേധിച്ചിരിക്കുന്നു. കാരണം, ഏകനായ ദൈവമല്ലാതെ മറ്റൊരു   ദൈവമില്ല. തങ്ങളുടെ വാദങ്ങളില്‍ നിന്ന് അവര്‍ വിരമിക്കുന്നില്ലെങ്കില്‍ അവരിലെ സത്യനിഷേധികളെ നോവേറിയ ശിക്ഷ ബാധിക്കുകതന്നെ ചെയ്യും."(അല്‍ മാഇദ :73) 

ധര്‍മ സ്ഥാപകര്‍ എല്ലാ ജനപഥങ്ങളിലെക്കും വന്നിട്ടുണ്ട് 

"ഓരോ സമൂഹത്തിനും ഓരോ ദൂതനുണ്ട്‌. അങ്ങനെ അവരിലേക്കുള്ള ദൂതന്‍ വന്നാല്‍ അവര്‍ക്കിടയല്‍ നീതിപൂര്‍വ്വം തീരുമാനമെടുക്കപ്പെടുന്നതാണ്‌. അവരോട്‌ അനീതി കാണിക്കപ്പെടുന്നതല്ല."(ഖുറാന്‍, യൂനുസ് :47)

"നിശ്ചയമായും എല്ലാ സമുദായത്തിലും നാം ദൂതനെ നിയോഗിച്ചിട്ടുണ്ട്. അവരൊക്കെ പറഞ്ഞതിതാണ്: "നിങ്ങള്‍ അല്ലാഹുവിന് വഴിപ്പെടുക; വ്യാജ ദൈവങ്ങളെ വര്‍ജിക്കുക.” അങ്ങനെ അവരില്‍ ചിലരെ അല്ലാഹു നേര്‍വഴിയിലാക്കി. മറ്റു ചിലരെ ദുര്‍മാര്‍ഗം കീഴ്പ്പെടുത്തുകയും ചെയ്തു. അതിനാല്‍ നിങ്ങള്‍ ഭൂമിയിലൂടെ സഞ്ചരിക്കൂ. എന്നിട്ട് സത്യത്തെ നിഷേധിച്ചുതള്ളിയവരുടെ ഒടുക്കം എവ്വിധമായിരുന്നുവെന്ന് നോക്കിക്കാണുക."(ഖുറാന്‍ ,അന്നഹ്ല്‍ :36)

ഇവിടെ ഇത് പൂര്‍ണ്ണമാകുന്നില്ല.........സ്ഖലിതങ്ങള്‍ ഉണ്ടായേക്കാം .......